Ռայսը պատրաստակամություն է հայտնել աջակցել ԵԱՀԿ ՄԽ-ի համանախագահներին

15:33 Yerevan | 11:33 GMT | Thursday 17 July 2008

Էմմա Գաբրիելյան

Ղարաբաղյան հակամարտության կարգավորման առնչությամբ պաշտոնական Վաշինգտոնի` վերջին օրերի լռությունը երեկ խախտվեց:

Հիշեցնենք, որ մայիսի 28-ին Ադրբեջանի Հանրապետության օրվա առիթով ստացվեց ԱՄՆ նախագահ Ջորջ Բուշի շնորհավորական ուղերձը` ուղղված Ադրբեջանի նախագահ Իլհամ Ալիեւին, որում Ջ.Բուշը Միացյալ Նահանգների ժողովրդի անունից շնորհավորել էր Ադրբեջանի նախագահին ու ժողովրդին. «ԱՄՆ-ը` որպես գործընկեր, պատրաստ է աշխատել Ադրբեջանի հետ Լեռնային Ղարաբաղի հակամարտության արդարացի եւ երկարատեւ լուծման նպատակով»: Իսկ հունիսի 6-ին Սանկտ Պետերբուրգում կայացած` Սերժ Սարգսյան-Իլհամ Ալիեւ առաջին հանդիպման նախօրեին ԵԱՀԿ Մինսկի խմբում ամերիկացի համանախագահ Մեթյու Բրայզան ռուսաստանյան «Ռեգնում» գործակալությանը տված հարցազրույցում ուշագրավ մտքեր էր արտահայտել: Մասնավորապես, որ իրավունքի տեսանկյունից ԼՂ-ն Ադրբեջանի մաս է հանդիսանում: «ԼՂ-ն գտնվում է մյուս կողմի` էթնիկ հայ անջատողականների քաղաքական, ռազմական վերահսկողության տակ», գլխավորն այն է, թե կհաջողվի՞ հասնել համաձայնագրի կամ բանաձեւի ընդունմանը, ինչը թույլ կտա, որպեսզի Հայաստանն ու Ադրբեջանը պայմանավորվեն ԼՂ կարգավիճակի շուրջ. «Ես չգիտեմ, թե ինչպիսին կլինի համաձայնագիրը: Գիտեմ, որ անհրաժեշտ է համոզել երկու կողմերին համաձայնության գալ կարգավիճակի շուրջ, եւ դա բավական ժամանակ կպահանջի», - նշել էր ամերիկացի համանախագահը, ով կարծում է, որ կարող են հասնել նրան, որ ադրբեջանական յոթ շրջանները ետ վերադարձվեն Ադրբեջանին, որից հետո ապահովվի հայերի եւ ադրբեջանցիների համատեղ բնակությունը. «Հույս կա, որ համատեղ բնակությունը, համատեղ աշխատանքը, համատեղ առեւտուրը կարգավիճակի հարցի սրությունը կնվազեցնի: Քայլ առ քայլ կողմերն իրենք կարող են ԼՂ կարգավիճակի հարցում համաձայնության գալ», - հայտարարել է Մ.Բրայզան` ընդգծելով, որ հիշյալ տեսակետներն ամբողջապես կիսում է ռուսաստանյան ղեկավարությունը: «Հուսով եմ, որ ազդեցությունը Հայաստանում դրական կլինի, որ մեր հայ բարեկամների մոտ անվտանգության հասնելու ավելի ուժեղ վստահություն կլինի, ովքեր կգիտակցեն, որ պատերազմի վտանգը կտրուկ կնվազի: Այն բանից հետո, երբ տարածքները Ադրբեջանին վերադարձվեն, դրանք կապառազմականացվեն, այնտեղ միջազգային խաղաղապահներ կտեղակայվեն, Հայաստանի զինված ուժերը կհեռանան, նրանք չեն լինի այն լարված պայմաններում, ինչպիսին այսօր են», - նկատել է ամերիկացի համանախագահը մեկ անգամ եւս ընդգծելով. «Հուսով եմ, որ մեր բարեկամները Հայաստանում իրենց ավելի անվտանգ կզգան, երբ այդ տարածքները վերադարձվեն Ադրբեջանին, հուսով եմ, որ Հայաստանի քաղաքական համակարգի վրա դա դրական կանդրադառնա»: Մ.Բրայզան այդ հարցազրույցում նաեւ հավելել էր, որ համաձայնություն չի լինի, եթե այն ընդունելի չլինի Հայաստանի համար. «Ես համաձայն եմ, որ Հայաստանի նախագահի համար որոշակի վտանգ կլինի, եթե նա իր համաձայնությունը տա տարածքները Ադրբեջանին վերադարձնելու շուրջ, ինչպես նաեւ Ադրբեջանում է առկա քաղաքական վտանգ` եթե Հայաստանը ստանա այն, ինչ ուզում է տարածքների վերադարձի դիմաց», այնուհետեւ շեշտել է, որ հայկական կողմի համար բավական գրավիչ դրույթներ կան կարգավորման առաջարկներում. «Կստեղծվի ԼՂ-ն եւ Հայաստանը կապող միջանցք, կան հարցեր ԼՂ կարգավիճակի հստակեցման գործընթացի հետ կապված: Հնարավոր է, որ սա գրավի հայկական կողմին: Այնպես որ, ես կուզենայի ընդգծել, որ համաձայնագիրը պետք է ընդունելի լինի նաեւ Հայաստանի համար», - եզրափակել է ԵԱՀԿ ՄԽ-ի ամերիկացի համանախագահ Մ.Բրայզան:

ԵԱՀԿ Մինսկի խմբում ամերիկացի համանախագահ Մեթյու Բրայզան Հայաստանի ԱԳ նախարար Էդվարդ Նալբանդյանի` Միացյալ Նահանգներ կատարած այցի ֆոնին երեկ ադրբեջանական «Թրենդ» գործակալությանը տված հարցազրույցում հավաստիացրել է. «Վաշինգտոնը ողջունում է ղարաբաղյան խաղաղ գործընթացը ակտիվացնելու` նախագահների հանձնառությունը: Պաշտոնական Վաշինգտոնը ողջունում է ղարաբաղյան հակամարտության կարգավորման խաղաղ գործընթացը ԵԱՀԿ Մինսկի խմբի շրջանակներում ակտիվացնելու` Հայաստանի եւ Ադրբեջանի նախագահների հանձնառությունը»: Ամերիկացի համանախագահը տեղեկացրել է, որ մտադիր է Վաշինգտոնում հանդիպել Հայաստանի ԱԳ նախարար Էդվարդ Նալբանդյանի հետ, ով քառօրյա այցով ԱՄՆ-ում է, եւ քննարկել բանակցային գործընթացի ներկայիս վիճակը: ԵԱՀԿ ՄԽ-ի համանախագահները մտադիր են առաջիկա շաբաթների ընթացքում հանդիպել նաեւ Ադրբեջանի արտգործնախարար Էլմար Մամեդյարովի հետ. «Հուսով եմ` նախարարներից տեղեկանալ նրանց կարծիքի մասին բազային համաձայնագրի այն պահերի շուրջ, որոնք չլուծված են մնում», - նշել է Մեթյու Բրայզան: Նա նաեւ կառուցողական է գնահատել Հայաստանի արտգործնախարար Էդվարդ Նալբանդյանի եւ ԱՄՆ-ի պետքարտուղար Քոնդոլիզա Ռայսի` երկուշաբթի օրը Վաշինգտոնում կայացած հանդիպումը, որի ժամանակ, նրա փոխանցմամբ, Ռայսը պատրաստակամություն է հայտնել աջակցել ԵԱՀԿ Մինսկի խմբի համանախագահներին` օգնելու Հայաստանին եւ Ադրբեջանին հաղթահարել անցած տարվա նոյեմբերին Մադրիդում միջնորդների ներկայացրած առաջարկների շուրջ առկա տարաձայնությունները:

Քոնդոլիզա Ռայսի եւ Էդվարդ Նալբանդյանի հանդիպման առիթով ՀՀ ԱԳՆ մամուլի եւ տեղեկատվության վարչությունը տեղեկացրել էր, որ քննարկվել են Լեռնային Ղարաբաղի հիմնախնդրի կարգավորման բանակցությունների վերջին զարգացումները, ամրագրվել է, որ խնդիրը կարող է լուծվել միմիայն խաղաղ բանակցությունների միջոցով, որոնք ընթանում են ԵԱՀԿ Մինսկի խմբի շրջանակներում: Երկուստեք բարձր գնահատական տրվեց Մինսկի խմբի համանախագահների գործադրած ջանքերին, կարեւորվեց բանակցությունների շարունակումը 2007թ. մադրիդյան առաջարկությունների հիման վրա, որոնք հնարավորություն են ստեղծում առաջընթաց արձանագրել խաղաղ գործընթացում: Է.Նալբանդյանը Սպիտակ տանը հանդիպել է նաեւ ԱՄՆ նախագահի օգնական, նախագահի ազգային անվտանգության հարցերով խորհրդականի տեղակալ, դեսպան Ջեյմս Ջեֆրիի հետ: Է.Նալբանդյանն ու դեսպան Ջեֆրին եւս քննարկել են ԼՂ հիմնախնդրի կարգավորման գործընթացը, իսկ ԱՄՆ Կոնգրեսում, ուր տեղի է ունեցել Նալբանդյանի հանդիպումը Ներկայացուցիչների պալատի արտաքին հարաբերությունների հանձնաժողովի նախագահ Հովարդ Բերմանի հետ, վերջինիս խնդրանքով նախարար Նալբանդյանը ներկայացրել է Լեռնային Ղարաբաղի հիմնախնդրի կարգավորման գործընթացի վերջին զարգացումները, հայ-թուրքական հարաբերությունների կարգավորման հեռանկարները, ինչպես նաեւ Հայաստանի մոտեցումները տարածաշրջանային եւ միջազգային հարցերի վերաբերյալ:

շաբաթ, 4 հուլիս 2009

Ռայսը պատրաստակամություն է հայտնել աջակցել ԵԱՀԿ ՄԽ-ի համանախագահներին

15:33 Yerevan | 11:33 GMT | Thursday 17 July 2008

Էմմա Գաբրիելյան

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Քաղաքական

Լեգիտիմությունն է գտնում տիրոջը

Աշխարհ

Մերձավոր Արեւելքը` շարժման մեջ