Գավառականություն, հեռու «Ոսկե ծիրանից»

15:31 Yerevan | 11:31 GMT | Thursday 17 July 2008

Մարինա Բաղդագյուլյան

Հրանտ Մաթեւոսյանի 70-րդ հոբելյանական տարին էր: Եվ Հարություն Խաչատրյանը «Հրանտ Մաթեւոսյան» մշակութային հիմնադրամին առաջարկեց «Հայկական համայնապատկեր» մրցույթի շրջանակներում մեծ գրողի անվամբ մրցանակ սահմանել:

«Ոսկե ծիրան» փառատոնում լավագույն սցենարի համար երկու տարի` 2004 եւ 2006 թվականներին, «Հրանտ Մաթեւոսյան» մրցանակ է տրվել: Այս տարի հիմնադրամի տնօրեն, ռեժիսոր Դավիթ Մաթեւոսյանը «Ոսկե ծիրանի» «Հայկական համայնապատկերի» մրցույթին էր ներկայացրել իր «Թշնամիներ» կարճամետրաժ խաղարկային ֆիլմը: Ու քանի որ այս պարագայում առաջանում է «հետաքրքրությունների կոնֆլիկտ» կոչված իրավիճակը, երբ Դ.Մաթեւոսյանի ֆիլմը պիտի ներկայացվեր մի մրցույթում, որում իր հիմնադրամը մրցանակ է տալիս, ուստի կամ ֆիլմը պիտի ներկայացվեր, կամ մրցանակը պիտի տրվեր: Հիմնադրամի հոգաբարձուների խորհուրդը որոշեց, որ «Հայկական համայնպատկեր» մրցույթում «Հրանտ Մաթեւոսյան» մրցանակ կսահմանվի մյուս տարի, քանի որ այնպես է ստացվել, որ մրցանակը մինչ այդ, փաստորեն, տրվել է երկու տարին մեկ: Եվ այսպես, «Ոսկե ծիրանին» ներկայացվեց «Թշնամիները»: Նշենք, որ «Հայկական համայնապատկեր» մրցույթին մասնակցելու համար այս տարի ներկայացված ֆիլմերի ընտրությունը վստահվել էր Կինեմատոգրաֆիստների միության հանձնաժողովին: Բայց փառատոնի նախօրեին Դավիթ Մաթեւոսյանն իմացավ, որ ֆիլմը չի ընդունվել, մերժվել է: Ընդ որում` ոչ պաշտոնական աղբյուրներից` երեք տարբեր ասեկոսե-վարկածներով.

1) Կինեմատոգրաֆիստների միության հանձնաժողովը չի դիտել ֆիլմը, որովհետեւ չի ունեցել ֆիլմի DVD-ն:

2) Կինեմատոգրաֆիստների միության հանձնաժողովը գտել է, որ ֆիլմը բավարար չափով ազգային չէ:

3) Ֆիլմը մերժվել է` ռեժիսորի ընդդիմադիր կեցվածքի համար:

Եթե անգամ շատ-շատ ուզես ու փորձես տրամաբանության նշույլներ գտնել ասվածի մեջ, միեւնույն է` չես կարող. ինչպե՞ս է հանձնաժողովը դատողություններ արել ֆիլմի ազգային որակների մասին, եթե այն չի դիտել, քանի որ, ասենք, անփութորեն կորցրել է մրցույթի համար ներկայացված ֆիլմի DVD-ն: Բացի այդ, անցյալ տարի «Թշնամիներ» ֆիլմի պրեմիերայից հետո նույն ինքը` Կինեմատոգրաֆիստների միության նախագահ Ռուբեն Գեւորգյանցը մի քանի հարցազրույցներում բարձր էր գնահատել ֆիլմը: Գուցե Ռ.Գեւորգյանցի կարծիքը Կինեմատոգրաֆիստների միության դեմոկրատական հանձնաժողովում փոքրամասնությու՞ն է... Չնայած երրորդ վարկածի` ընդդիմադիր կեցվածքի մասին վարկածի հարթության մեջ ամեն անտրամաբանական քայլ հասկանալի է դարձել, այլեւս ոչ զարմանահարույց:

«Երեք ոչ պաշտոնական բացատրությունն էլ համարում եմ գավառականության դրսեւորում, - ասաց Դավիթ Մաթեւոսյանը, - Ես երբեւէ խնդիր չունեմ, չեմ ունեցել եւ չեմ կարծում, թե կունենամ «Ոսկե ծիրան» փառատոնի տնօրինության հետ: Բայց նախնական ընտրությունը կատարող հարգարժան հանձնաժողովը պիտի բացատրելու կամ ընդհանրապես չբացատրելու եղանակ գտներ` փառատոնը գավառականությունից զերծ պահելու համար»:

Աշխարհի բոլոր քաղաքակիրթ փառատոներն ունեն մերժման իրենց կարգը: Իհարկե, որոշ փառատոներում ընդհանրապես մերժելու պատճառը չեն բացատրում, բայց դա ընդունված կարգ է, ուստի ռեժիսորները բացատրությունների չեն սպասում, ոչ էլ` ինչ-ինչ ասեկոսե-վարկածներ են շրջանառության մեջ դրվում:

«Ինձ մտահոգում եւ տխրեցնում է այն հանգամանքը, որ գավառականությունը` որպես մեր միջավայրի հիմնական չափորոշիչ, սողոսկում է «Ոսկե ծիրան», ինչը շատ վտանգավոր է եւ ինչի մասին ուզում եմ զգուշացնել մեր կինեմատոգրաֆիստ հասարակությանը, - նշեց Դ.Մաթեւոսյանը, - Չնայած կազմակերպչական բնույթի հարցերում չկայացածությանը` այնուամենայնիվ այս փառատոնը թափ հավաքելով առաջ է գնում: Եվ ես հույս ունեմ, որ բարձր արդյունքների է հասնելու «Ոսկե ծիրանը» եւ նրա շնորհիվ բարելավում է լինելու մեր կինոարտադրության մեջ»:

շաբաթ, 4 հուլիս 2009

Գավառականություն, հեռու «Ոսկե ծիրանից»

15:31 Yerevan | 11:31 GMT | Thursday 17 July 2008

Մարինա Բաղդագյուլյան

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Քաղաքական

Լեգիտիմությունն է գտնում տիրոջը

Աշխարհ

Մերձավոր Արեւելքը` շարժման մեջ