“Zhamanak” Armenian-American Political Daily
English

Արժանի լինենք մեր հերոսական ժողովրդին

12:18 Yerevan | 8:18 GMT | Saturday 5 July 2008

Արժանի լինենք մեր հերոսական ժողովրդին
Քաղբանտարկյալ Գագիկ Ջհանգիրյանի ուղերձը հանրահավաքի մասնակիցներին

Հայաստանի Հանրապետության արժանապատիվ եւ ազատ քաղաքացիներ,

Մեծարգո Նախագահ

Արդեն 4 ամիս եւ ավելի է, ինչ մենք հանիրավի, առանց որեւէ օրինական հիմքի պահվում ենք Երրորդ հանրապետության նորօրյա զնդաններում: Այդ ընթացքում անընդհատ ենթարկվել ենք ներխցային «մշակումների», հոգեբանական եւ դատավարական ճնշումների: Սակայն մեր եւ մեր հարազատների ազատությունը չենք դարձրել քաղաքական սակարկությունների առարկա, չենք ընկճվել ու չենք ընկրկել որեւէ ուժի առաջ:

Մեր խցերից զգացել ենք Համաժողովրդական Շարժման անկոտրում կամքն ու ազատատենչ ոգին, ինչը մեզ հավելյալ ուժ ու կորով է ներարկել:

Մի խնդրանք եւ հորդոր ունենք ձեզ. մեր անազատության մեջ գտնվելու փաստը թող չընկճի ու չվհատեցնի ձեզ, այլ հակառակը` թող ոգեկոչի պայքարի ու հաղթանակի: Հանուն Ազատ եւ Անկախ Հայաստանի, հանուն մեր երեխաների ու թոռների, հանուն Հայաստանի ապագայի պատրաստ ենք մեկուսացման այս ծանրությունը կրել որքան անհրաժեշտ է:

Հավատարիմ ենք մնացել Համաժողովրդական Շարժման գաղափարներին, Հայաստանի Հանրապետությունում սահմանադրական կարգը վերականգնելու, իրավունքի եւ օրենքի իշխանություն հաստատելու հրամայականին:

Ես դիմում եմ մեր քննիչներին, դատախազներին եւ դատավորներին, որոնցից շատերին դասավանդել եմ, շատերին ճանաչում եմ, մի մասի հետ նաեւ աղ ու հաց եմ կիսել. հարգելի կոլեգաներ, դուք դեռ որքա՞ն պետք է անմեղ մարդկանց բերման ենթարկեք, ձերբակալեք, կալանավորեք ու դատեք: Մի՞թե կարելի է այդքան անողնաշար ու կամակատար լինել: Մի՞թե կարելի է այդքան ընկնել: Մի՞թե դուք տարրական հարգանք չունեք ձեր մասնագիտության ու ձեր գիտելիքների հանդեպ: Կարելի՞ է, արդյոք, արդարադատության դեմ ուղղված նման մասշտաբի, մասսայական հանցագործություններ կատարել: Ժողովուրդն ասում է. «Սխալի կեսից ետ դառնալն էլ տղամարդկություն է»: Դուք վտանգում եք ոչ միայն ձեր անձը, այլեւ ձեր երեխաների ու թոռների` մեր երկրում ազատ ու արժանապատիվ ապրելը, նրանց ապագան:

Դիմում եմ նաեւ Լեւոն Տեր-Պետրոսյանի շուրջ համախմբված բոլոր քաղաքական ուժերի եւ հասարակական կազմակերպությունների ղեկավարներին, մեր քաղաքական պայքարի ընկերներին: Քաջ գիտակցում եմ, որ իշխանություններն ամեն ջանք ու միջոց գործադրում են ձեր մեջ անվստահություն, կասկածամտություն եւ պառակտում սերմանելու նպատակով: Բոլոր քաղաքական բանտարկյալների անունից գոհունակություն եմ հայտնում, որ նրանց մինչ այժմ չի հաջողվել որեւէ առաջխաղացում, եւ վստահ ենք, որ չի հաջողվելու:

Ժողովրդի սերն ու հարգանքը երկար տարիների քրտնաջան աշխատանք է պահանջում, իսկ կորցնելը` վայրկյանների հարց է: Ձեր աչքի առաջ է Արթուր Բաղդասարյանի օրինակը:

Արժանի լինենք մեր հերոսական ժողովրդին եւ տեր կանգնենք նրա բնական, Սահմանադրական իրավունքների վերահաստատմանը:

Քաղաքական բոլոր բանտարկյալների անունից, կարծում եմ նաեւ հանրահավաքի բոլոր մասնակիցների անունից եւս, լիազորված եմ դիմել Համաժողովրդական Շարժման բոլոր առաջնորդներին` Լեւոն Տեր-Պետրոսյանի գլխավորությամբ. հանուն մեր երկրի ու ժողովրդի արժանապատիվ ապագայի առաջնորդեք Համաժողովրդական Շարժումը մինչեւ հաղթական ավարտ: Մեզ բացակա չդնեք: Այդ պայքարում Ձեզ հետ ենք:

Պայքար, պայքար, մինչեւ վերջ:

Լուսանկարը՝ Ֆոտոլուրի
Վերլուծական
Ազատ ստեղծագործական ժանրից

Ազատ ստեղծագործական ժանրից

Ներսես Երիցյանը դարձել է վերջին օրերի «սիրելի» թեման:

Քաղաքական
ԼՂՀ ԱԺ ընտրությունների թեկնածուներ. ով ով է

ԼՂՀ ԱԺ ընտրությունների թեկնածուներ. ով ով է

Աշոտ Ղուլյանն առաջադրվել է իր թաղում

Աշխարհ
Յոթ երգ` ութ բանի մասին

Յոթ երգ` ութ բանի մասին

Արժույթի միջազգային հիմնադրամի առաքելության ղեկավար Մարկ Լյուիսը երեկ, փաստորեն, արդարացրել է Հայաստանի...

Արխիվ

Copyright © 2004–2010 — “Zhamanak” Armenian-American Political Daily. All rights reserved.

Reproduction in whole or in part without permission is prohibited.