Գտնվել են Գոյայի նկարները...

11:51 Yerevan | 7:51 GMT | Thursday 29 May 2008

Իսպանացի հանճարեղ նկարիչ Ֆրանցիսկո Գոյայի 3 յուրահատուկ նկարները հայտնաբերվել են գողանալուց 130 տարի անց: Ակնկալվում է, որ նկարները կվաճառվեն Քրիստիի աճուրդում ոչ պակաս 2 միլիոն ֆունտ սթեռլինգով, ինչը համարժեք է գրեթե 4 միլիոն դոլարին: Նկարչի ուսումնական ալբոմում գտնվող երեք ուրվանկարները կորած են համարվել 1877 թվականից, երբ վերջին անգամ ցուցադրվել են Փարիզի աճուրդում` տարբեր դիրքերում մարդկային կերպարանքներ պատկերող կտավների հետ, որոնք թվագրված են 1796 թվականով: Նույն 1877 թվականին նկարները վաճառվել են չնչին գնով` 6-ից մինչեւ 140 ֆրանկ: Արվեստագետների կարծիքով` Գոյայի այս էսքիզները ունեն բացառապես ուսուցողական նպատակ եւ չեն համարվում ավարտուն գործ: Առաջին ուրվանկարը պատկերում է մարտնչող կանանց, երկրորդը` հոգնատանջ մարդու` սատկած ձիու գերեզմանին, երրորդը` աղոթող տղամարդու` լայն բացված բերանով: Էսքիզները հայտնաբերվել են Շվեյցարիայում: Տերերը մինչ այժմ չեն իմացել, որ աշխատանքները պատկանում են մեծանուն իսպանացուն: Քրիստիի աճուրդի ներկայացուցիչը հայտարարել է, որ նկարները գերազանց վիճակում են: Նույն աճուրդի փորագրությունների բաժնի ղեկավար Բենջամեն Փերոնեթը հայտարարել է, որ ուրվանկարները կգերեն տարբեր կոլեկցիոներների եւ թանգարանների: Ակնկալվում է, որ նկարները կվաճառվեն Քրիստիի` լոնդոնյան աճուրդում` հուլիսի 8-ից հետո: Մինչ օրս Գոյայի ամենաթանկ վաճառված աշխատանքը գնահատվել է 1, 3 միլիոն ֆունտ սթեռլինգ:

...Եվ Աֆրոդիտեի արձանը

Եգիպտացի հնագետները Դոմինիկյան Հանրապետության իրենց գործընկերների հետ Միջերկրական ծովի ափին հայտնաբերել են Հին Հունաստանի սիրո աստվածուհի Աֆրոդիտեի բրոնզե արձանը: Պեղումները ընթացել են Ալեքսանդրիայի հյուսիսային ծովափում` հնագույն` Taposiris Magna տաճարի մերձակայքում: Եգիպտոսի հնությունների հարցերով խորհուրդը տեղեկացրել է, որ Taposiris Magna տաճարը կառուցվել է Պտղոմեոս Երկրորդի (282-246թթ. Քրիստոսի ծննդից առաջ) օրոք:

Արժեքավոր հայտնագործություն

Վաթսունամյա հնագետ Զախի Հավասը ենթադրում է, որ հայտնաբերել է Կլեոպատրայի թաղման վայրը: Մասշտաբային հայտնագործությունը նա արել է 2 շաբաթ առաջ, այժմ հույս ունի հայտնաբերելու նաեւ նրա հոմանու` Մարկոս Անտոնիոսի գերեզմանը: Ինչպես ենթադրվում է` երկուսին թաղել են Օսիրիսի տաճարի մերձակայքում` Ալեքսանդրիայից 28 մղոն արեւմուտք: Տարածքը կրում է «Taposiris Magna» անունը: Հավասը գերեզմանի տակ հայտնաբերել է թունել` 400 ֆուտ երկարությամբ: Երկու շաբաթ անց Հավասի գիտարշավը հայտնաբերեց Մարկոս Անտոնիոսի կիսանդրին: Մարկոս Անտոնիոսը եւ Կլեոպատրան ինքնասպան են եղել: Մարկոս Անտոնիոսը` սեփական թրով, իսկ Կլեոպատրան, ըստ առասպելի, թունավոր օձի խայթոցից: Դրանից հետո միայն` Քրիստոսի ծննդից առաջ 31 թվականին Օկտավիանոսը ջախջախեց նրանց զորքը: Մյուս մասնագետները այս իրողությանը զգուշությամբ են վերաբերվում:

Կանադայի թանգարանը եւս թալանվել է

Մարդաբանական թանգարանից գողացել են Ինկերի հնագույն ոսկե մանյակներ, ինչպես նաեւ կանադացի նկարիչ եւ քանդակագործ Բիլ Ռեյդի ոսկե արձանիկները: Այդ մասին տեղեկացրել է թանգարանի ներկայացուցիչ Սքոթ Մաքրեյը: Նրա խոսքով` դրանք գին չունեն: Բիլ Ռեյդը (1920-1998թթ.) համարվում է կանադացի նշանավոր քանդակագործ եւ նկարիչ: Նրա աշխատանքները կրում են խաղաղօվկիանոսյան առափնյա տարածքի հնդկացիների ոգին:

Վաճառվեց ռեկորդային գնով

Չին ժամանակակից գեղանկարիչ Ցզեն Ֆանչժիի կտավը «Քրիստիի» աճուրդում վաճառվել է 9, 66 միլիոն դոլարով: «Արվեստի ասիական շուկան տվյալ պահին գտնվում է իր հանրահայտության գագաթնակետում», - կարծիք է հայտնել «Քրիստիի» աճուրդի ասիական բաժնի տնօրեն Ջոնաթան Սթոունը: Նա ներկայացրել է այս տարվա աճուրդի գնորդների ցուցակը, որում ոչ միայն ասիացի մասնավոր կոլեկցիոներներ են, այլ նաեւ եվրոպացիներ: Ցզեն Ֆանչժիի «1996 6» նկարը երբեք աճուրդի չի ներկայացվել: Դիպտիխը պատկերում է 8 դեռահասների` դիմակներով եւ վզկապներով, ովքեր հիշեցնում են Մաո Ցզեդունի երիտասարդ կարմիր գվարդիականներին: Աճուրդի ներկայացուցիչները չեն հրապարակում նկարի նոր տիրոջ անունը:

շաբաթ, 4 հուլիս 2009

Գտնվել են Գոյայի նկարները...

11:51 Yerevan | 7:51 GMT | Thursday 29 May 2008

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Քաղաքական

Լեգիտիմությունն է գտնում տիրոջը

Աշխարհ

Մերձավոր Արեւելքը` շարժման մեջ