Գլխավոր էջ Լրահոս Քաղաքական Արտաքին քաղաքական Աշխարհ Վերլուծական Տնտեսություն Հասարակություն Սպորտ Մշակույթ Ընտրություններ

Ի՞նչ է անում կամ անելու հանձնաժողովը...

12:10 Yerevan | 8:10 GMT | Thursday 15 May 2008

...Էն էլի, որ իբրեւ թե Եվրոպայի խորհրդի խորհրդարանական վեհաժողովի Հայաստանի Հանրապետության ժողովրդավարական հաստատությունների գործունեությանը վերաբերող բանաձեւում նշված առաջարկությունների իրագործման նպատակով ստեղծվել է մեր երկրում:

Իսկապես չեմ հասկանում:

Ոչ թե որ անհույս բութ եմ: Չէ: Անհույս չեմ:

Իսկ չեմ հասկանում, որովհետեւ...չեմ հասկանում:

Էդ ԵԽԽՎ բանաձեւում սեւով սպիտակի վրա գրված է. ազատ արձակել բոլոր ձերբակալվածներին, ովքեր անազատության մեջ են հայտնվել իրենց քաղաքական հայացքների եւ սկզբունքների համար, իրականացնել մարտի 1-ի իրադարձությունների միջազգային անկախ հետաքննություն, երկխոսություն սկսել ընդդիմության հետ, թույլատրել հանրահավաք-երթ-ցույց անելը:

Ի՞նչն է անհասկանալի, որ հանձնաժողով են ստեղծել: Ո՞ր մասը չեն հասկացել, որ հանձնաժողովը պիտի կարդա-պատմի-բացատրի:

Եվ արդյո՞ք նրանք, ովքեր սեւով սպիտակի վրա գրած բաները առանց տարբեր հանձնաժողովների օգնության` կարդալ-պատմել-բացատրելու, չեն հասկանում` իրավունք ունեն պաշտոններ, առավել եւս` բարձր պաշտոններ զբաղեցնել: Թեկուզեւ` Հայաստանում:

Եվ արդյո՞ք այդ հանձնաժողովներում ընդգրկված են այնպիսիք, ովքեր հասկանում են: Գրվածից: Սեւով` սպիտակի վրա: Կարդալով: Առանց կողմնակի աջակցությունների: Ինքնուրույն:

Չգիտեմ:

Ես` չեմ հասկանում: Ոչ թե գրվածը, այլ գրվածը կարդալ-հասկանալ-բացատրելուն կոչված հանձնաժողովի գոյությունը:

Իսկապես չեմ հասկանում:

Ու ոչ թե էն պատճառով, որ անհույս բութ եմ: Ու անհասկացող:

Չէ: Անհույս չեմ: Էս վերջերս, օրինակ, սկսել եմ ահագին բաներ հասկանալ: Ուշացումով, ճիշտ է, բայց դե...

Սկսել եմ հասկանալ, օրինակ, որ մարդկանց բաց թողնելու համար ոչ թե հանձնաժողով է պետք ստեղծել, այլ...բաց թողնել:

Որ, օրինակ, երթերը-ցույցերը-հանրահավաքները կարելի է թույլատրել...թույլատրելով դրանք:

Որ միջազգային անկախ հետաքննություն կարելի է անցկացնել` միջազգային անկախ հետաքննություն անցկացնելով:

Որ ցավոտ խնդրի մասին երկխոսությունը նշանակում է երկխոսություն ցավոտ խնդրի մասին:

Տեսնու՞մ եք: Ասում էի, չէ՞, որ անհույս չեմ:

Իսկ եթե ես հասկացել եմ, ուրեմն էլ մարդ պիտի մնացած չլինի, որ հասկացած չլինի:

Ուրեմն` ինչի համար են էդ հանձնաժողովները` «պրոստո»` լենինաբար, գործը թաղելու՞, թե՞...

...Հե~յ, ո՞վ կա այդտեղ:

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Ինչպես հայտնի է, ամեն ինչ համեմատության մեջ է երեւում: Չնայած որեւէ արտահայտություն, այդ թվում եւ վերը նշվածը, չի կարող լինել...

Քաղաքական

Լեգիտիմությունն է գտնում տիրոջը

«Գրողը չէ, որ գրելիք է փնտրում: Գրելիքն է փնտրում գրողին»: Այդ տողերի հեղինակն...

Աշխարհ

Մերձավոր Արեւելքը` շարժման մեջ

Հանճարեղ ելույթները հաճախ թերագնահատում են` համարելով պարզ խոսքեր: Իրականում դրանք կարող են լրջագույն հետեւանքներ...

Գլխավոր էջ Լրահոս Քաղաքական Արտաքին քաղաքական Աշխարհ Վերլուծական Տնտեսություն Հասարակություն Սպորտ Մշակույթ Ընտրություններ

Copyright © 2004-2007 — Zhamanak Armenian-American political information-analytical center. All rights reserved.

Reproduction in whole or in part without permission is prohibited.