Իրողությունների փաստագրում

17:39 Yerevan | 13:39 GMT | Saturday 26 April 2008

Երեկ, «Ազատություն» ռադիոկայանով հաղորդվել է, որ «Ժառանգություն» կուսակցության նախագահ Րաֆֆի Հովհաննիսյանը միջնորդություն է առաջարկել` Լեւոն Տեր-Պետրոսյանի եւ Սերժ Սարգսյանի միջեւ հանդիպում կազմակերպելու նպատակով: Մասնավորապես` «Ժառանգություն» խմբակցության քարտուղար Ստեփան Սաֆարյանը հայտնել է, որ «մինչեւ ստրասբուրգյան քննարկումները Րաֆֆի Հովհաննիսյանը դիմել էր եւ նախագահ Լեւոն Տեր-Պետրոսյանին, եւ գործող նախագահ Սերժ Սարգսյանին` պատրաստակամություն հայտնելով նպաստել երկխոսությանը: Համենայնդեպս Լեւոն Տեր-Պետրոսյանի կողմից եղել է անգամ գրավոր համաձայնություն: Պարոն Հովհաննիսյանը հանդիպում է ունեցել Սերժ Սարգսյանի հետ, սակայն որեւէ հաստատակամություն կամ հաստատական պատասխան չի եղել»:

Փաստի խորհրդապահական լինելու պատճառով Լեւոն Տեր-Պետրոսյանի գրասենյակը զերծ է մնացել այն հրապարակելուց: Սակայն այժմ, երբ դա արդեն հայտնի է դարձել, մենք նպատակահարմար ենք գտնում տպագրել Րաֆֆի Հովհաննիսյանի նամակը եւ Լեւոն Տեր-Պետրոսյանի պատասխանը:

Լեւոն Տեր-Պետրոսյանի գրասենյակ

Րաֆֆի Հովհաննիսյանի նամակը

10 մարտի 2008թ.

ՀՀ Առաջին նախագահ

Լեւոն Տեր-Պետրոսյանին

Երեւան

Հարգելի հայրենակիցներ,

Ձեզ հրավիրում եմ մեր երկրի ապագային միտված եւ արդեն հրամայական դարձած քննարկման: Առաջարկում եմ, որ հանդիպումը տեղի ունենա միմիայն ձեր անմիջական մասնակցությամբ, առայժմ անարձանագիր ընթացակարգով եւ հրատապ ժամանակացույցով` Երզնկյան 75 հասցեում գտնվող Ռազմավարական կենտրոնում: Այս նպատակի համար այն զօրուգիշեր ձեր տրամադրության տակ է:

Սպասելով ձեր պատասխանին` խնդրում եմ ուղղակի, դեմ-դիմաց, միգուցե բախտորոշ հաղորդակցության հնարավորությունը բաց չթողնել: Ուշ չէ:

Լավագույն բարեմաղթանքով

Րաֆֆի Հովհաննիսյան

Լեւոն Տեր-Պետրոսյանի պատասխանը

Րաֆֆի Հովհաննիսյանին ի պատասխան 10.03.2008թ. նամակի

Սիրելի Րաֆֆի,

Գնահատում եմ քո խորին մտահոգությունը ներկա իրավիճակից դուրս գալու անհրաժեշտության առթիվ եւ ողջունում քո նախաձեռնությունը` իմ եւ Սերժ Սարգսյանի միջեւ հանդիպում կազմակերպելու վերաբերյալ: Ես պաշտոնապես հայտարարել եմ, որ Հայաստանի իշխանությունների հետ ցանկացած երկխոսության հիմք եմ համարում ԵՄ նախագահության ս/թ մարտի 4-ի հայտարարության պարունակած բոլոր չորս կետերը` արտակարգ դրության դադարեցում, խոսքի, մամուլի, զանգվածային միջոցառումների անցկացման ազատություն, քաղբանտարկյալների ազատ արձակում եւ մարտի 1-ի իրադարձությունների միջազգային անկախ հետաքննության իրականացում: Հանդիպումից առաջ պետք է բավարարված լինի ԵՄ նախագահության հայտարարության մատնանշած առնվազն մեկ պահանջը, այն է` բոլոր ձերբակալվածների ազատ արձակումը:

Հարգանքով`Լեւոն Տեր-Պետրոսյան

Երեւան, 11 մարտի, 2008թ.

հինգշաբթի, 20 դեկտեմբեր 2008

Իրողությունների փաստագրում

17:39 Yerevan | 13:39 GMT | Saturday 26 April 2008

Որոնում

Արխիվ

Վերլուծական

Որտեղի՞ց են ծանոթ նրանց դեմքերը

Քաղաքական

Վարչապետը սպառնալիք է ստեղծել լրագրողի համար

Աշխարհ

Գլոբալիզացիան շարունակվում է