Լոս Անջելեսաբնակ հայ մտավորականներին: Բաց նամակ

12:44 Yerevan | 8:44 GMT | Wednesday 9 April 2008

Մեծարգո տիարք Սույն թվականի ապրիլի 3-ին կալանավայրում, որը կոչվում է «Երեւան-Կենտրոն» քրեակատարողական հիմնարկություն (գտնվում է ՊԱԿ-ի շենքում), կարդացի Ձեր բաց նամակը եւ ուղղակի ցնցված եմ Ձեր` հայաստանյան իրողությունների իմացությամբ: Հիրավի միայն խորը մտահոգությունն է Ձեզ պարտադրել այս ճշմարտությունները բարձրաձայնելու:

Սփյուռքում, ցավոք սրտի, մենք դեռ ունենք հայրենակիցներ, որոնք ապրելով տարբեր քաղաքակիրթ երկրներում` առիթը բաց չեն թողնում հաճկատար լինելու, գովեստի խոսքեր շռայլելու Հայաստանում տիրող ֆաշիստական ռեժիմի հասցեին:

Նման մարդիկ, հուրախություն մեզ, երկու տասնյակից ավելի չեն: Իմացեք, որ ռեժիմի երկրպագուները հենց այնպես չեն գովերգում Ռ.Քոչարյանին եւ Ս.Սարգսյանին, նրանք բոլորը այս կամ այն չափով մասնակից են եղել մեր եւ Ձեր Մայր Հայրենիքի տոտալ թալանին:

Նորից եւ նորից իմ եւ իմ ընկերների անունից երախտիքի խոսք եմ ասում Ձեզ` ՇՆՈՐՀԱԿԱԼՈՒԹՅՈՒՆ հարգելի տիկնայք եւ պարոնայք, եթե թույլ կտաք` քույրեր եւ եղբայրներ:

Ձեր հնչեցրած խոսքը մենք` կալանավորներս շատ ենք կարեւորում (մենք գտնում ենք, որ կալանավորված ենք քաղաքական հայացքների համար): Զգալով Ձեր եղբայրական շունչը` ավելի ենք ամրանում մեր հավատքի մեջ եւ գոտեպնդվում:

Այսպես շարունակվել չի կարող` Հայրենիքն է վտանգված: Այսօր կալանավորված են Արցախի ազատամարտի հերոսներ, նախկին եւ ներկա ԱԺ պատգամավորներ, կուսակցապետեր եւ ուղղակի մտածող մարդիկ, որոնք անտարբեր չեն Հայրենիքի ցավի հանդեպ:

Մեզ մեղսագրված են քրեական հոդվածներ, որոնց հետ ընդհանրապես կապ չունենք: Մեր անմեղության մասին ամենատեղյակը այսօրվա իշխանություններն են, քանզի նրանք են, որ սադրիչների օգնությամբ մասսայական անկարգություններ հրահրեցին, որի հետեւանքով եղան զոհեր եւ բազում վիրավորներ:

Մեզնից եւ ոչ մեկը կապ չունի հրահրված անկարգությունների հետ:

Տեսնելով, որ այլ ապացույցներ չունեն` ոստիկանությանը դիմադրություն ցույց տալու հոդվածով են մարդկանց դատապարտում, որոնք բնավ ոչ մի դիմադրություն ցույց չեն տվել եւ չէին կարող ցույց տալ:

Մենք կոչ ենք անում Ձեզ` համատեղել մեր ջանքերը Հայրենիքի փրկության գործում: Ոչ լեգիտիմ նախագահը նոր արհավիրքների առջեւ կկանգնեցի մեր եւ Ձեր Հայրենիքը: Այս պարագայում փրկությունը տեսնում ենք միայն Լեւոն Տեր-Պետրոսյանի առաջնորդած համազգային Շարժման շարունակելիության մեջ: Միայն նա կարող է հանուն Հայաստանի ապագայի մղվող այս պայքարը հասցնել իր տրամաբանական, հաղթական ավարտին:

Պայքար, պայքար մինչեւ վերջ:

Հաղթելու ենք:

ԱԺ նախկին պատգամավոր,

ազգային անվտանգության ծառայության պաշտոնաթող գնդապետ,

քաղաքական բանտարկյալ`

Գուրգեն Եղիազարյան

Հ.Գ. 2005թ. հոկտեմբերին Փարիզում սկիզբ առած զանգվածային անկարգությունները տեւեցին 3 շաբաթ, որի ընթացքում թալանվեցին եւ հրկիզվեցին հազարավոր խանութներ, տուժեցին խաղաղ բնակիչներ, հրկիզվեց շուրջ 9000 ավտոմեքենա: Այս ամենի արդյունքում վիրավորվեցին 126 ոստիկան, սակայն ցուցարարների մեջ սպանվածներ եւ վիրավորներ չեղան:

Խնդրում եմ այս ամենը համեմատել երեւանյան դեպքերի հետ, եւ պարզ կդառնա, թե ինչու 8 անմեղ մարդու արյուն թափվեց (ըստ պաշտոնական վիճակագրության): Նպատակը մեկն էր` մեզ մեկուսացնելը, որպեսզի կլանը տոնի իր կեղծած հաղթանակը:

Գ.Ե.

հինգշաբթի, 20 դեկտեմբեր 2008

Լոս Անջելեսաբնակ հայ մտավորականներին: Բաց նամակ

12:44 Yerevan | 8:44 GMT | Wednesday 9 April 2008

Որոնում

Արխիվ

Վերլուծական

Որտեղի՞ց են ծանոթ նրանց դեմքերը

Քաղաքական

Վարչապետը սպառնալիք է ստեղծել լրագրողի համար

Աշխարհ

Գլոբալիզացիան շարունակվում է