Human Rights Watch-ը Հայաստանի կառավարությանը կոչ է անում

14:10 Yerevan | 10:10 GMT | Saturday 29 March 2008

...վերացնել խաղաղ հավաքների նոր սահմանափակումները...

Հայաստանի կառավարությունը պետք է վերացնի հավաքների ազատության նոր սահմանափակումները եւ դադարեցնի բողոքի խաղաղ ցույցերին մասնակցող ընդդիմության կողմնակիցներին բերման ենթարկելը: Այդ մասին այսօր հայտարարել է Human Rights Watch միջազգային իրավապաշտպան կազմակերպությունը: Կազմակերպությունը նշում է, որ մարտի 25-27-ը ոստիկանությունը բերման է ենթարկել առնվազն ութ տասնյակ մարդու, որոնք մասնակցել են Երեւանի կենտրոնում անցկացվող բողոքի խաղաղ ցույցերին` «ժողովրդական զբոսանքներին»: «Հայաստանի կառավարությունը պետք է թույլ տա խաղաղ ցույցերը, այլ ոչ թե արգելի դրանք», - հայտարարել է Human Rights Watch-ի Եվրոպայի եւ Կենտրոնական Ասիայի տնօրեն Հոլի Քարթները` շեշտելով. «Նոր սահմանափակումները գործնականում խաղաղ ցուցարարներին պատժում են մարտի 1-ին տեղի ունեցած բռնությունների համար»: Իրավապաշտպան կազմակերպությունը պնդում է, որ հավաքների ազատությունը սահմանափակող օրենսդրական փոփոխությունները, որոնք Ազգային ժողովի կողմից ընդունվել են մարտի 18-ին, անորոշ են եւ չեն համապատասխանում Հայաստանի ստանձնած պարտավորություններին: «Մարդու իրավունքների եվրոպական կոնվենցիան, որին Հայաստանը միացել է, երաշխավորում է հավաքների ազատությունը, եւ կառավարությունը չի կարող անխոհեմ սահմանափակումներ մտցնել այդ իրավունքի նկատմամբ», - ասված է Human Rights Watch-ի հայտարարությունում: «Մարդու իրավունքների եվրոպական դատարանը խաղաղ հավաքների իրավունքը նկարագրել է որպես «ժողովրդավարական հասարակության հիմքերից մեկը» եւ բազմաթիվ առիթներով հաստատել է, որ անհատները չեն կարող կորցնել խաղաղ հավաքների իրենց իրավունքը որեւէ ցույցի ընթացքում այլոց պատժելի արարքների պատճառով»: Կազմակերպությունը մատնանշում է, որ Հայաստանի իշխանությունները, օգտվելով այդ օրենսդրական փոփոխություններից, առնվազն վեց անգամ մերժել են Երեւանի Ազատության հրապարակում հանրահավաքներ անցկացնելու` ընդդիմադիր կուսակցությունների հայտը: Կառավարությունը իր մերժումը հիմնավորում է այն ենթադրությամբ, որ մարտի 1-ի բռնությունների մասնակիցները կարող են մասնակցել նաեւ հետագա հանրահավաքներին:

երկուշաբթի, 8 սեպտեմբեր 2008

Human Rights Watch-ը Հայաստանի կառավարությանը կոչ է անում

14:10 Yerevan | 10:10 GMT | Saturday 29 March 2008

Որոնում

Արխիվ

Վերլուծական

Մտավորականություն կոչվածը` բարոյալքման գործոն

Քաղաքական

Հերթական անակնկալը

Աշխարհ

Եվ դարձյալ հայ-թուրքական թեմայով