Հայտարարություն

13:54 Yerevan | 9:54 GMT | Friday 29 February 2008

Մենք` քաղաքացիական հասարակության ներկայացուցիչ ներքոստորագրյալ կազմակերպություններս, մեր խորին մտահոգությունն ենք հայտնում 2008թ. փետրվարի 19-ի ՀՀ նախագահական ընտրությունների, նախընտրական շրջանի, ընտրարշավի եւ հետընտրական գործընթացների վերաբերյալ:

Միջազգային դիտորդների գնահատականը, որը կառավարության եւ վերջինիս կողմից վերահսկվող լրատվամիջոցների կողմից փորձ է արվում ներկայացնել դրական լույսի ներքո, քննադատական էր: Սակայն զեկույցի առաջին երկու նախադասությունների եւ գնահատականի փաստերի միջեւ առկա այս ակնհայտ հակասության արդյունքը դարձավ այն, որ կառավարությունը մեջբերում է միջազգային դիտորդների գնահատականի միայն առաջին պարբերությունը` լեգիտիմիզացնելու ընտրության արդյունքները: Մինչդեռ միջազգային դիտորդները զեկույցում մատնանշել են լրատվության գրաքննության, ընտրողներին վախեցնելու, քվեներ գնելու, ինչպես նաեւ այլ փաստեր եւ իրենց այցելած 16 տոկոս ընտրատեղամասերի քվեների հաշվարկը անվանել են «վատ» կամ «շատ վատ»: Նման պրակտիկան որպես «մի քայլ առաջ» եւ «ազատ ու արդար ընտրություններ անցկացնելու պարտավորություններին համահունչ» որակելը հարցականի տակ է դնում ժողովրդավարության, ժողովրդավարական չափանիշների եւ սկզբունքների գաղափարը եւ ավելի է նվազեցնում ժողովրդավարական բարեփոխումների չափանիշները:

Ներքոստորագրյալ կազմակերպություններից մի քանիսը որպես դիտորդ են հանդես եկել ընտրության օրը եւ հետեւել են ընտրական գործընթացներին մինչ փետրվարի 19-ը, ինչպես նաեւ դրանից հետո ընկած ժամանակահատվածում: Այդ կազմակերպությունների զեկույցներում փաստագրված են բռնությունների բազմաթիվ դեպքեր եւ խախտումներ:

Մեզ համար առանձնահատուկ մտահոգություն են առաջացնում լրատվամիջոցների ազատության, լրատվության մատչելիության, բռնությունների, կոռուպցիայի եւ վարչական ռեսուրսների օգտագործման եւ հասարակական գործիչների ձերբակալության երեւույթները:

Կարեւոր կետերից մեկը, որ ԵԱՀԿ/ԺՀՄԻԳ-ի դիտորդական առաքելությունը մատնանշել է իր միջանկյալ զեկույցում, վերաբերում է ընտրական գործընթացի հանդեպ հասարակական վստահություն ձեւավորելուն: Խորը անվստահությունը եւ հաճախ արծարծվող հասարակական ապատիան ոչ այլ ինչ է, քան Հայաստանի ժողովրդի ինքնապահպանման հակազդեցությունն ընդդեմ անպատժելիության մթնոլորտի նրանց շուրջ, որոնք ընտրակեղծիքներ են իրականացրել նախկին բոլոր ընտրությունների ժամանակ: Ընտրություններից հետո տեղի ունեցող գործընթացները տագնապալի են եւ անկասկած կխորացնեն հասարակության անվստահությունը:

Մենք հավատացած ենք, որ քանի դեռ ընտրական կեղծիքները չեն հետաքննվում եւ պատժվում, վստահություն չի լինի ընտրական գործընթացի, ինչպես նաեւ դատաիրավական համակարգի նկատմամբ:

Մենք կարծում ենք, որ վերոհիշյալ խնդիրների շուրջ միայն բաց եւ լայն զանգվածներին ներառող հասարակական քննարկումների միջոցով է հնարավոր վերականգնել հասարակական վստահության մթնոլորտը:

Ելնելով վերը նշվածից` մենք գտնում ենք, որ այս ընտրությունները չեն իրականացվել ժողովրդավարական արժեքների եւ գործընթացների վերաբերյալ մեր ունեցած պատկերացումներին համահունչ:

Մենք համոզված ենք, որ այն մոտեցումը, որն իշխանությունները կկիրառեն ընտրախախտումները հետաքննելիս ցույց կտա վերջիններիս վճռականությունը` գործել ժողովրդավարական ազատ եւ արդար ընտրություններ անցկացնելու կանոնների համաձայն:

Մենք կոչ ենք անում Հայաստանի կառավարությանը դադարեցնել քաղաքական դրդապատճառներ ունեցող ձերբակալությունները: Սրանք անպատժելիության կոչեր չեն, այլ կոչ կառավարությանը` օրինակ ծառայել Հայաստանի ժողովրդի համար եւ գործել օրենքի շրջանակներում:

Մենք կոչ ենք անում միջազգային հանրությանը տեր կանգնել Հայաստանի կառավարության` ընթացակարգերին հետեւելու պարտականության կատարմանը եւ պահանջել հետաքննության հստակ փաստաթղթագրում եւ պատշաճ պատիժ օրենքը խախտողների նկատմամբ:

Մենք կոչ ենք անում միջազգային հանրությանը կատարել օբյեկտիվ եզրակացություններ` հիմնված սեփական փաստերի դիտարկումների վրա եւ չվարկաբեկել ժողովրդավարության գաղափարը, ժողովրդավարական չափանիշներն ու սկզբունքները, ինչպես նաեւ չպատվազրկել դիտորդական առաքելություն իրականացնող միջազգային կազմակերպությունները:

«Ասպարեզ» ժուռնալիստների ակումբ

Խոսքի ազատության պաշտպանության կոմիտե

Հայաստանի հելսինկյան կոմիտե

Հայաստանի հելսինկյան քաղաքացիական ասամբլեայի Վանաձորի գրասենյակ

«Ինտերնյուս» Մամուլի աջակցության հ/կ

Մամուլի բազմազանության ինստիտուտ

Բաց հասարակության ինստիտուտի օժանդակության հիմնադրամ-Հայաստան

Թրանսփարենսի ինթերնեշնլ հակակոռուպցիոն կենտրոն

Երեւանի մամուլի ակումբ

շաբաթ, 4 հուլիս 2009

Հայտարարություն

13:54 Yerevan | 9:54 GMT | Friday 29 February 2008

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Քաղաքական

Լեգիտիմությունն է գտնում տիրոջը

Աշխարհ

Մերձավոր Արեւելքը` շարժման մեջ