Օրինազանցները պատասխան կտա՞ն

16:45 Yerevan | 12:45 GMT | Wednesday 6 February 2008

Հայաստանի գլխավոր դատախազության պաշտոնական կայքէջից տեղեկանում ենք, որ դատապարտյալներին պատիժը կրելուց պայմանական-վաղաժամկետ ազատելու գործընթացում ի հայտ են եկել լուրջ բացթողումներ:

Դատախազությունը այդ խնդրով է սկսել զբաղվել ՀՀ վճռաբեկ դատարանի նախագահ Հովհաննես Մանուկյանի` գլխավոր դատախազին հղած պաշտոնական գրությունից հետո, համաձայն որի նշյալ գործընթացում անտեսվել են պատժի եւ դրա նպատակների վերաբերյալ օրենսդրության սկզբունքները, ոչ միշտ է պատշաճ քննարկվել ազատվող դատապարտյալների անձը եւ նրան բնութագրող հատկանիշները, իրական գնահատական չի տրվել պատժի կրման ընթացքում դատապարտյալի դրսեւորած վարքագծին, կատարած հանցագործության բնույթին ու հասարակական վտանգավորության աստիճանին եւ այլ հանգամանքների: Դատախազությունն ուսումնասիրել է 2006-ին եւ 2007-ի առաջին կիսամյակում դատապարտյալներին պատժի կրումից ազատելու պրակտիկան եւ արձանագրել, որ, իրոք, «քրեակատարողական հիմնարկների վարչական հանձնաժողովների կողմից պատիժը կրելուց պայմանական-վաղաժամկետ ազատման են ներկայացվել ծանր եւ առանձնապես ծանր հանցագործությունների համար դատապարտված, ուղղման եւ վերադաստիարակման ուղին չբռնած դատապարտյալներ»: Օրինակ` «Արթիկ» քրեակատարողական հիմնարկը պատիժը կրելուց պայմանական-վաղաժամկետ ազատման է ներկայացրել նախկինում 7 անգամ դատված Հայկ Ավետիսյանին` դրական բնութագրմամբ (նա 2004-ին դատապարտվել էր գողության համար` 6 տարի 6 ամիս ժամկետով ազատազրկման): «Էրեբունի» քրեակատարողական հիմնարկից ազատման են ներկայացվել 6 անգամ դատված Արմենակ Խաչատրյանը, 9 անգամ դատված Արման Զաքոյանը, 8 անգամ դատված Ռոլանդ Մարտիրոսյանը եւ մի շարք այլ հանցագործներ: Սակայն, ըստ դատախազության, ՔԿՀ-ների որոշումների մեծ մասը չեն իրագործվել անկախ հանձնաժողովների կողմից հավանության չարժանանալու, ինչպես նաեւ դատաքննության ժամանակ դատախազի կարծիքը դատարանի կողմից հաշվի առնելու արդյունքում: Եղել են դեպքեր, երբ դատապարտյալին պատժի կրումից ազատել են գործող կարգի ակնհայտ խախտմամբ: Եվ ստացվել է հետեւյալ պատկերը. «2005-2007 թվականների ընթացքում պատժից պայմանական-վաղաժամկետ ազատված 2344 անձանցից առաջին ատյանի դատարանների կողմից նորից դատապարտվել են 285 մարդ կամ 12.2 տոկոսը, որը վկայում է պատիժը կրելուց պայմանական-վաղաժամկետ ազատման գործընթացում առկա` նկարագրված եւ այլ բնույթի թերությունների եւ բացթողումների մասին», - նշված է գրության մեջ:

Հ.Գ. Միամիտ մարդն այս հաղորդագրությունից կարող է եզրակացնել, որ ՔԿՀ-ների ղեկավարները հանցավորությանը «զարկ տվողներն» են, իսկ դատախազությունը, դատարաններն ու պատժի կրումից պայմանական-վաղաժամկետ ազատման անկախ հանձնաժողովները հանցավորության դեմ ակտիվ պայքարողները: Բայց եթե այդ նույն միամիտը մտաբերի, որ դեռ անազատության մեջ են քաղբանտարկյալներ` արցախյան ազատամարտի նվիրյալներ Ժիրայր Սեֆիլյանը, Վարդան Մալխասյանը եւ «ԺԵ» թերթի գլխավոր խմբագիր Արման Բաբաջանյանը, հասկանալի կդառնա, որ դատապարտողների եւ ազատողների այդ ամբողջ շղթայում «սրբեր» չկան (լավագույն դեպքում): Իսկ եթե դրան հավելենք աղմկահարույց գործերով, օրինակ` Գյումրու քաղաքապետ Վարդան Ղուկասյանի որդու, եղբորորդու հայտնվելն ազատության մեջ եւ դատախազության խորհրդավոր լռությունն այդ կապակցությամբ, ԱԺ պատգամավոր Հակոբ Հակոբյանի եղբորորդու` Ստեփան Հակոբյանի մասով քրգործից մաս անջատելը եւ մինչ օրս չհայտնաբերելը եւ այլն, ավելի կխորանան միամիտների կասկածները: Բացի այդ, հետաքրքիր է` դատախազությունն ի՞նչ միջոցներ է ձեռնարկելու ՔԿՀ-ի վարչական հանձնաժողովների կանոնախախտների եւ ՊԿՊՎԱ «անկախ» հանձնաժողովների անդամների նկատմամբ, որոնց մեղքով կրկին հանցագործություններ են կատարվել:

Օրինականության հաստատմամբ մտահոգ

ՀՀ քաղաքացի` Է. Մարտիրոսյան

շաբաթ, 4 հուլիս 2009

Օրինազանցները պատասխան կտա՞ն

16:45 Yerevan | 12:45 GMT | Wednesday 6 February 2008

Որոնում

Արխիվ

Վերլուծական

Հնարավորությունների բացված դուռն ու քանդված մենաշնորհը

Քաղաքական

Լեգիտիմությունն է գտնում տիրոջը

Աշխարհ

Մերձավոր Արեւելքը` շարժման մեջ